السبت، 19 ديسمبر 2009

الحج و آداب الاستئذان فى الزيارة



الســلام عليكم ورحمة الله جميعا

رجعو العويلة من رحلة الحج الى تمنو فى نفسهم طولت اكثر ,,

ومن اول يوم استقبلتهم فيه فى المطار بدت تقابلنى عاداتنا الاجتماعية الى منها مقبول ومحمود والى منها تشعرك باحساس الاستغراب وبعض منها بنفور ...

قبل ما نتكلم مش تقولو مى راهو مش عاجبها شى ...

لا والله لكن ممكن ضغط الى مريت بيه هو الى خلانى نتكلم ونكتب

خلى نرجعو مع بعض من لحظة وصول الطائرة على متن مطار طرابلس الدولى والزحمة والخلق
ودورة نسمع صوت النوبة والزكرة تخبط فى وسط مطار طرابلس العالمى ...

وكل ما يطلع حاج اوحاجة تنصك زغروطة صوتها يضرب لقلب السمى

وانى ندعى ونقول فى نفسى

(( ان شاء الله غير النوبة تكمل قبل ما يطلعو العويلة وخصوصا امى ))

لنه متخيله كان تسمعها تقوللهم مانى طالعة من الطيارة لين تكملو دوشتهم ...

انى عارفه الناس فرحنين بماليهم وبسلامتهم لكن مش لدرجة نوبة وهبال وعلى شنو..

للعودة من بيت الله الحرام واحد غاسل ذنوبه تقابله الذنوب من اول لحظة تطئ فيها اقدامه ارض المطار !!

لا والى عجبنى فى الموضوع أن فى نفس التوقيت كانت فى رحلة تانية واصله و من ركابها كان الدكتور

(( ابراهيم الفقيه ))

والى مفيش ولا ليبي انتبه او لاحظ وجوده و ذلك بسبب أنسجامهم مع الطرب الشعبى !!!!


هى اقل من 24 ساعة والعويلة والاحباب والاصدقاء والمقرابين بدو يهلو علينا ...

فاعلى اساس انى درت الزقاطة وتفهمت مع من بقى من العائلة انى نختصر الاحتفلات الى حتكون مفتوحة لفترة الى ما شاء الله فى يومين ...

يوم مخصص لعزومة الرجال واليوم الاخر للنسويين فا اتصلت بيه بنت خالتى قالتى وامتا عزومة الصغار ؟؟؟؟
قلتلها بعد ما يكبرو ان شاء الله ههههه

وبدى المهرجان الى اصلا بادى من قبل من تجهيز للحلو والحار

من يقيم ومن يحط والى حارق بصلته والى داير روحه ميندرى على شى

وفوق هذا نسمع فى كلمات طايشة متاع من هنى وغادى






(( الحج ما ينعزمش عليه ... الحج يقعد مفتوح امتا ما الواحد يبى يمشى يمشى ))


نظريا الكلام صح وانى معه لكن تطبيقيا ما ينفعش فى زمننا هذا.. لماذا ؟

لنه الى بيستقبل الضيوف الى هى حضرتى

وانا امرأة عاملة وشغلى يتطلب منى ساعات عمل طويلة تمدد حتى بعد عودتى الى البيت احيانا

يعنى فضوتى فى اخر الليل

حيث لا تنفع معه الزيارات الرسمية بسبب الارهاق والتعب من ناحيتى والتوقيت من ناحية الضيف

نرجعو لموضوعنا مشو اليومين على خير وانى قاعدة مستاحشه ماليه نبى نهدرز عليهم ونسئلهم كيف كانت الرحلة لكن باش نتلقوا هيهات ..

واحد ماشى وواحد جاى
قلت بينى وبين نفسى المهم فى الفرح مش مشكلة

و زى تخصصى يوم زى عشرة النظام الليبى فى الزيارات سوف يبقى على ماهو عليه الى حين اشعار اخر ...

يعنى عادى نتوقع فى اى لحظة يشرين الحوش ...

ولما نرد منو!؟ ...

نسمع من الطرف التانى من السماعة افتحى !!!

نعم !!

شنو منو افتحى هدى ...


ونسمع الكلام

زينى زى البنت الطيبة و نفتح الباب ونستلقى وعدى

ناس جايين من اقاصى البحار والغيفار ومن غير موعد ...

ليلتنا فل ان شاء الله

شنو حالك.. باهية...

أمشى أمشى او درس درس يا مختار او فرج او جمعة او بوعجيلة او أين كان تحت اى مسمه

اهو العويلة قاعدين !!!


وهم خاششين نركز فى الساعة9/8 مساءا العشى اذن وعاود والوقت تاخر بتوقيتنا الشتوى

يعنى نقول بينى وبين نفسى

سهرة عربية طيبة يا ميووش

ونعاود ونكرر والله ماهو كره فى الضيف ولكن الى نعرفه أن لزيارة أداب فى الاستئذان ...

وهذا واضح فى الشرع والدين ومذكور بكتاب الله وسنة رسوله

يحرم على الإنسان أن يدخل بيت غيره من الناس إلا باستئذان لقوله عز وجل { يَا أَيُّهَا الَّذِينَ آمَنُوا لَا تَدْخُلُوا بُيُوتاً غَيْرَ بُيُوتِكُمْ حَتَّى تَسْتَأْنِسُوا وَتُسَلِّمُوا عَلَى أَهْلِهَا } سورة النور (27)

ومرة تانية نرجعو لنفس الموضوع

عدوة الاهل من الحج.. واخيرا تلقينا على خير بعد مرور عدة ايام

وانى نستنى فى دورى باش نهدرز عليهم

رحلة العمر هذا ما وصفته لى عائلتى لرحلتهم المباركة ...

متمنيين لى مثيلها فى العام القادم






لم يشتكو اهلى من رحلتهم فى شى لا بلعكس كل شى كان فى خير ما يرام

الجملة الوحيدة الى قعدو ينصحو بيها ان الحج يبى صحة وجهد

وكما قال رسولنا صلى الله عليه وسلم


(تعجلوا الى الحج فأن أحدكم لا يدري ما يعرض له) "رواه احمد
"

و حجو قبل أن لا تحجو، صدق الحبيب المصطفى صلى الله عليه وسلم




شنو حسه ؟؟!!

لحظة بس ..

اسفة بنستئذن ....

صوت شريانة الحوش الباين ضيوف جدد ...

وللحديث بقية

مـــى