العيد فرحه,,, فكل عام والجميع بالف خير

السلام عليكم جميعا...

ليس العيد لمن لبس الجديد,,, انما العيد لمن طاعته تزيد ليس العيد لمن تجمل باللباس والركوب,,, انما العيد لمن غفرت له الذنوب

كل عام والجميع بصحه وسلامه ,,, وان شاء الله كل واحد يعطيه ربى الى فى باله ويصلح حاله ويسرله اموره ياربى العالمين اللهم امين..

اللهم انى صمت وعلى رزقك افطرت فاغفر لى ما قدمت وما اخرت

سحور خبزه وجبنه فى التوستر ,,

صفرة الحلو ... بعد الفطور مع الكباتشينو,,

على فكرة مش عيد ميلاد حد؟؟؟ هذه مقلوبه مش كيكه,,,, لنه فى هلبه سئلونى عليها.. وقالولى لاش حطيها الكيكه فى تبسى !!!

واخر صورة لكاس محلبيه فى اخر ليلة من رمضان ,,,

السلام عليكم ورحمة الله جميعا

هذه بعض الصور صورتها فى فترة رمضان لصفرة الفطور او اطباق للسحور وفيهم شويه صور حلو .... تقعد ذكره وان شاء الله كل عام حيين ومن اهل الدنيا

قف عند هذه المحطة

السلام عليكم ورحمة الله جميعا ......

لماذا تريد ان تتزوج ؟ وما مواصفات الشخص الذى تريد ان ترتبط به ؟

انا اعلم ان الكثير سوف يستغرب ولا ربما يستهجن سؤالى الذى طرحته على الجميع مدونين كانوا او مارين,,,, سؤال قد لم يخطرببالك واحيانا خطر ولكنك تغاضيت على الاجابه وهو موجه الى الجنسين الرجال قبل النساء !!! ولكن رجائى ان تكون اجابته صريحه وواضحة وليس كلام نظرى ولا يمت للحقيقه باى صله ؟؟؟ والسبب فى هذا اعتمادى على اجاباتكم فى موضوع البوست القادم منى لكم 1000 سلام

ملاحظه : هذا الموضوع موجه ايضا الى المتزوجين فا انا على علم ان الكثير منكم لم يسئله لنفسه لا قبل الزواج ولا بعده واذا سئلته هل وجدت الاجابه!!؟؟؟ ارجو ايفادتى برايكم فا رائيكم يهمنى

عند العجايز كل شى جايز!!!!؟؟؟؟

السلام عليكم جميعا..

الفريج

مسلسل كرتونى مش عادى السنه هادى الموسم الثالث ليه الجميل والممتع فى هل المسلسل ينقلك فى احداث بين 4 عجائز مستمتعين بحياتهم وكل وحده عندها تفكير يختلف على التانيه لكن فى الاخر يجتمعوا مع بعض فى حلقات انى شخصيا نحب نتبعها ,,,

مخرج هل المسلسل(( الفريج)),, يعنى الحى بلغه العربيه (( محمد سعيد حارب))... جاء بى هل فكرة من رسومات وتحولت الى رسوم متحركه وتتطورت حتى اصبحت مسلسل كرتونى من الدرجه الاولى والمهم فى هذا الموضوع والذى اثار انتباهى انه صغير فى السن ويعتبر جديد فى هذا المجال ولكن الامل والطموح حولت الحلم الى حقيقه والفكرة الى واقع ... ومن كثر ان هل الكرتون لقيه استحسان الجمهور اصبحت شخصياته .. ام سعيد, ام علاوى, ام سلوم, ام خماس معلم من معالم الامارات .

انى شخصيا ننصحكم تشوفوه ولو حلقه واحده .................... على فكرة هوا قريب هلبه فكرته من الرسوم الرمضانيه الى عندنا زى (( الحاج حمد)) لكن بشكل متطور جدا وبصورة عاليه الجودة والنقاوه

العمرة والحج فريضة ام تباهي اجتماعي

عمره وخلالالالالالالالالالالالالالالالالالاص

السلام عليكم ورحمه الله

الى خلنى نكتب اليوم ها الموضوع حدث صار معى من فترة مش بعيده ... ويتعلق بحكاية الحج والعمره فى رمضان

نبداء القصه من الاول كنت فى مجمع نسائى لمناسبه اجتماعيه تكثر فيه الاحاديث من كل اشكال وانواع وطريقة سرد هل المواضيع تختلف من وحده الى التانيه وكل وحده تتسابق انها تكون مركز جادبيه واهتمام اكثر من الاخريات !!!!

معاده واحده كانت على اغلب الوقت جالسه تستمع فقط الى درجة انى اعتقدت انها قد تكون اجنبيه ولا تفتهم ما يقولن... عموما وجاءت سيرة او حكاية العمره فى رمضان وانطلقنا نتناقش على هذا الموضوع من ناحيه اجابياته وسلبيته فا كنت انا احد المتحمسات لهذا الموضوع وابديت راي فيه ..

(( والله قداش خاطرى نمشى لكن الى منعنى الزحمه والفوضه الى صايره بحكايه ان بدت المشى لناس معينه بس يعنى بمفضوح الى عندهم هلبه فلوس والى يديروا فيها كا نوع من التباهى فى رمضان بقولهم حنى كل سنه فى العمره ؟؟؟؟!!!!))

وانى قلت هل الكلمه وانطلقت كلمات هذيك المرأه الى كانت طول الجلسه ساكته كا الرشاش واكتشفت اخيرا انها طبيعيه وليست اجنبيه او خرسا مثلا وما جعلها تتحدث ظن منها ان الكلام عليها وبدت

(( والله ربى قال الى عنده فلوس لاش يدسهم ماهو يمشى يعتمر بيهم خير )) رديت عليها (( باهى انى مش رافضه هل المبداء بس مش كل سنه يخلى فرصه لغيره)) ردت (( والله الطيران موجود وارض الله واسعه ))

تعجبت ورديت (( الفكرة فى الحاله الماديه والظروف الاجتماعيه )) قلتلى ((كيف ما فهمتش تراه وضحيلى )) وفى كلامها نبرة السخريه؟؟؟؟
رديت (( يعنى فيه معنداش حق ضرورياته ليكمل بيهم باقى الشهر يعنى المفروض الى ماشى ومعاود مدام هوا يبى الاجر يقدر يتبرع بيها هل المشيه الى هل الانسان وبنسبه الى الظروف الاجتماعيه يعنى مرات يبداء عنده هلبه صغار ميقدرش يرفعهم معه ومعنداش اصلن وين يوزعهم ))

وكانى اشعلت فتيل الحرب وردت عليه وصوتها بدى فيه لهجة التحدى وكثرة المعرفه بامور الدين اكثر من غيرها (( والله الانسان يبى يمشى للاجر مش لتباهى وبعدين انى نرفع فى صغرى كلهم معاى منخليش فيهم بجميل حد))

حولت نهذى الموضوع لنه امى كانت مقابلتنى وبدت تفنص فيه ,,,, (( انى ما نبيش نجدلك لكن تعالى نحسبوها مع بعض انت عارفه العمره السنه هادى قتاش تكلف على اقل تقدير؟؟))

ردت مسرعه امممممممممممم حوالى مابين 5الاف و7الاف انفر الواحد.. باهى هذا لشخص الواحد باهى نخلوها الى 4 اشخاص رغم ان عيلتها مش اقل من 7 يعنى نخدوا المتوسط 6 الاف لشخص فى 4 يعنى 24 الاف هل اربع وعشرين الاف وكان سنه تمشى بيهم وسنه تصدقيهم على حد من ها الشباب الى يبوا يتزوجوا يقدر يكمل بيهم حاجات ضروريه فى حوشه ولا تقدرى تشرى بيهم سيارتين لعيلتين قاعدين يتشحوروا فى التاكسى والمكيروات صيف وشتى ولا تحوليهم مصروف لطلبة علم ممكن يسدهم سنه كامله وانتى صرفتيهم فى مدة اسبوعين ولا شنوا رايك))

رمتنى بنظرة شزرا وقالتلى وانتى شنوا فهمك فى امور الدين ... تخيلوا تراه قولوا لاش قلتلى هكى لنه تعتبر حجابى وطريقتى فى التفكير طريقه حضاريه ولا تمت بالدين بصله وانها فقط ومن اشكالها فقط الذين يفتهمون بدين ,بعمره كل سنه وبى.....,.......,....... والكثير الكثير من مظاهر الالتزام الدينى ...

ربى يهدى من خلق عموما فى الاخر سكت لنه شعرت ان النقاش عقيم ولان يجدى بشى لكن روحت مضايقه عليها وهيا بها التفكير والمشكله ان هل العقليه عندنا منها هلبه والله حرام ,,,, ولا اخفيكم سرا طول الطريق وامى تعتبنى على انى قعدت ناقش فيها وقلتلى عيب تناقشى وحده اكبر منك وفاهمه فى امور الدين قلتلها هوا كل من يعتمر ويحج كل سنه يعنى يفتهم فى امور الدين ,,, كويس مليح بكل !!!!

الالتزام مش شكل ومظاهر بس الالتزام هو الخلق ومعاملة وبعدين دينا هو الى يقول ان الاعمال بنيات ولكل امر ما نوئ


فارجوكم قولولى لو كلامى غلط او صح وانى نستنا فى رايكم انتم الخاص فى الموضوع

واجب من اول مرة

السلام عليكم ورحمة الله

توا شنوا بنقول ها الواجب سببلى ربكه شويه ....

لكن فى الاخيرمشى الحال

اولا _هل الواجب بعتتهولى ميمى بارك الله فيك على ها الحصله

ثانيا _ نذكر سته اسرار ممكن ما يكتشفهاش حد اول ما يشبحنى اول مره

توا بنقول 6 حاجات لكن الى بيضحك فيكم بنشبحه فا من غير ضحك اهو نبهت........

شكلى يوحى ببراءه وطفوله وهذا فى شخصيتى الشى الكثير لكن فى ناس تعتبر انى
(( دهوله وممكن ان ينضحك عليه)) وانا فعلا احب ان العب هذا الدور واستمتع جدا حين ارى نظرة الشفقه التى تتخللها ضحكات صخريه لنه هوا يضحك والضحك عليه

2/ فى حاجه منقدرش نسيطر فيها على نفسى وتعتبر نقطة ضعفى وهيا ((التشيبس)) اعشقها بكل انواعها واتلذذ فى شراء ارقى الانواع واحسنها على الاطلاق ومستعده ان اقف حتى ساعة فى السوبر ماركت حتى اقلبها بين يدى واستمتع بقراءة نشرتها من اين صنعت ومكوناتها ..... والخ

3/ لونى المفضل هوا الاحمر والزهرى و الموف كل ما يتدرج منهم من الوان لدرجة انى عندما ادخل الى اى محل فيه حاجه حمراء لازم نمسها هذا لو مشريتهاش عكسك يانور يا ازرق زرقينى ما خلاش النوم ايجينى!!!!

4/ عندى ضحك غريبه تقول فاتح رسوم كرتون والمشكله ان ها الضحكه ما تطلعش الا مع موقف مضحك وغريب وما فيش حد يسمعها الا ما يقعد يضحك لضحكتى اتذكر فى ايام الجامعه كان معنا زميل طلب منى فى ذات الايام ان اسجل له ضحكتى حتى يستطيع ان يضحك كل ما كان مضايق .... تخيلوا ها طلب محلنى وانى مسجله ضحكتى

5/ فى حاجتين مشتركتين بينى وبين نسيم حب الاشياء الصغيره والغريبه ... وحكايه كلمتك واتيه فا جوابى ذائما سريع على اى موقف او كلمه او تعليق لدرجة مرات نتحشم نقولها خوف من الى قدامى ميفهمهاش انها عفويه تطلع ومش مدروسه ...

6/ اخيرا وليس باخر عندى ذاكره ولله الحمد تفلق الصخر ما شاء الله لا قوة الا بالله الصوت او الشكل او الصوره او اى حاجه انشوفها نقعد مذكره ادق التفاصيل فيها لدرجة ان العائله اصبحوا يستعينوا بى فى تذكر بعض الاشياء التى مضت عليها سنون وليست سنوات تبارك الرحمن ولكن الشى المضحك انى بمقابل منقدرش نحفظ رقمين على بعضهم يعنى رقم تليفون مثلا لو قاتيه قدامى حتى الف مره مستحيل نحفظه الا بعد ما نكتبه,,,.

وتواه جى وقت النومينى لهل الاسبوع هههههه قصدى لها التاج الملكى والاسماء هما :-

1- مدونة كريمة الفاسي

.www.libyanpassport.blogspot.com
2-سرورا

http://sweet-kid.blogspot.com/
3-مهيار

http://hamassatadabia.blogspot.com/

اما اختيارات الثلاثه الباقين بنقسمهم وحده على عبد الله ووحده على نسيم ووحده على ميمى

وانى حا نبلغ الثلاثه الى ذكرتهم فى مدوناتهم بنقل التاج ليهم وانتم يا ثلاثى المرح ديروا الى قلتلكم عليه وبلغوه الى خترتوهم بسرعه مش ترقدوا ولا تقولوا انسينه راهوا بنتبعكم اول باول


سلامى للجميع