السبت، 29 نوفمبر، 2008

معرض الكتاب يرحب بكم ؟؟






بدون تعليق



السلام عليكم ورحمة الله جميعا ,,,,


وصلنى فى الفترة الماضية مسج من شركة ليبيانا يقول (( تقيم مكتبة طرابلس العلمية والعالمية معرض للكتاب خلال الفترة من 25/11/2008 الى 5/12/2008 وذلك امام مقر المكتبه بشارع الجمهورية التخفيضات ستكون سارية على جميع الكتب )).

عمتكم ((مى)) ما صدقت وطول اتصلت بنسيم وحاولت نكلم ميمى ونديروا موعد فى المكتبه منها نشوفوا الجديد ومنها عندى ديوان ندور فيه نبى نشريه ... وبعض كتب خاصه للاطفال المهم كان الموعد يوم الخميس الماضى ..

ماشيه وكلى نشاط وحيويه على اساس معرض زى كل سنه ,,, واول ما وصلت تفاجئت بلخيمه الى هيا المقصود بيها المعرض !!! تجمدت دقيقة وقلت بينى وبين نفسى (( لا اكيده الى داخل خير )) وكانى نصبر ونواسى فى نفسى من الفاجعه !!! المهم,,, درت دوره فى المكان قصدى فى الزنقه الصغيرونه ولقيت روحى لا شعوريا خشيت للمكتبة طرابلس العلمية العالمية

وطبعا اكيد عندى بعض الملاحظات زى مثلا مساحة المكتبه محدوده ومحصورة مش عارفه علاش وبعدين حتى وين تقعمزى باش تتصفحى كتاب ما فيش يعنى تلقى روحك مدنبه غصبا وكرها ,,, يعنى بعربيه خود الكتاب الى جاى على خاطره واطلع ,,,

لكن هذا ما يمنعش ان فى حاجات عجبتنى ..ومنها طلبت المساعدة من احدى امينات المكتبه فى ايجاد ديوان فلبت الطلب بسرعة و مشت ادور فيه هنى وغادى وسئلت احد المسئولين فى المكتبه فرجعت وعلى وجها ابتسامه وقالتلى (( والله كمل )) ,,
((نسومه)) ما هفتتش روحها لازم تعلق (( اهو ما صار من شى )) زدتنى على انى فيه؟؟؟؟ قلتلها باهى كان فى كتابات وقصص للاطفال نبى ناخد مجموعة على خاطر عيد الطفل لصغار خوتى وخواتى قلت نوتيهم من توه

وفعلا لقيت قصص وشويه كتابات لكن وين اسعارهم خيالية يصل سعر القصة القصيرة الى اكثر من 25 دينار وهذه قيمة وحده من سلسلة كاملة تخيلوا لو بنشرى لكل واحد فيهم مجموعة او سلسلة يعنى نلقى روحى فلست ؟؟!!

عاد منبيش نحكيلكم على نسيم نحس فيها شويه وبتقولى قريب نمشوا للبحر نلقوه جف ... ههههه

وطبعا رجعنا بخفى حنين وقبل ما نروحوا قلتلها جاى فى بالى ايس كريم ,,, هيا نمشوا للقصر عنده حاجه باهية ,, يا نارى قالتى باهى تساير فيا وبعد الدوشه وعناء الطريق المزدحم .. ملقيناش وين ندرسوا السيارة الشرطة واقفه والطريق مسكرة,,,, المره هذى نسيم قالتلى ولا يهمك مرة تانيه اليوم مش يومك يا مى

يالله المهم هذى اهم احداث يوم الخميس الى كنت نخطط انه حيكون احسن من هكى ,, ,,,,,,,,,,,,,,

(( انت تريد وهذا يريد والله يفعل ما يريد))

الثلاثاء، 18 نوفمبر، 2008

واخيرا ,, وليس باخر

الدنيا مغرقه بلمطر



الشارع تقولى وادى ما شاء الله


السلام عليكم ورحمة الله


واخيرا مطر فى طرابلس (( الحمد لله على النعمه)) متعرفوش ما مذى سعادتى بسقوط حبات المطر,,, وهذا الموضوع ليه تدوينه خاصه والى زاد الجو انتعاش اكثرو اكثر صديقتى نسومة,,, nasimlibya ,

شوفتها اليوم وتلقينا مع بعض فى سوق الثلاثاء الجديد (( وحتى هو عندى عليه تدوينه)) درنا دورة فيه لكن احسن حاجه وحنى مروحين بمجرد حطينه رجلنا على باب السوق والمطر نزلت مره وحده.. شوفتلها و قلتلها والهى منا موخرين بنطلعوا فيها.... نسيم حتى هيا ما صدقت وقالتلى يالله شنو تراجى ,,, المسافة بين السيارة والسوق صغيرة لكن من شدة المطر وحنى محملين بلبضاعه ونتمختروا تحت المطر وصلنا لسيارة مغسولين والحمد لله لكن,,حسينا بمتعه مش عادية وقعدنا نضحكوا فى السيارة والى يخطم يقول هذوا خيرهم ؟؟؟؟!!!


المطر نعمة ,, لكن فى مشكلة وحده طرقنا ما شاء الله عليهم لا سالك منهم الى ماشى على رجليه ولا حتى الى فى السيارة ؟؟!!!

وهذه بعض الصور معبره على الموقف