الأربعاء، 28 يناير، 2009

خيراتنا ما شاء الله


















السلام عليكم ورحمة الله


اليوم نضت من الصبح بكرى مشيت (( حوتت )) !!؟؟

متستغربوش ايه حوتت ... يعنى مشيت شريت حوت من المرسى او سوق الحوت السوق الجديد(( حشى عيونكم)) ليه فترة وانى نحلم نمشيله وربى مش كاتب اليوم قلت مش مفوتاته رغم ان الجو مش مشجع بكل

وصلت لسوق وما شاء الله فيه كل شى منظم ومرتب ... وبصراحة عجبنى المكان وخصوصا انه فى حاجات مكانتش موجودة فى السوق الحوت زمان منها..

حكاية التسعيرة على شاشات البلازما....وفى حاجة اسمها لوحة الاعلانات كتبين عليها اى معلومة جديدة او تنبيه من قبل الرقابة والحارس البلدى..

وبصراحة الى يخدموا فيه كانوا بشوشين ويرحبوا بيك خصوصا لما استئدنت فى اخد بعض الصور ..كانت ردت فعلهم تذل على لأباقتهم وأغلبهم ردوا عليه بهذه الجملة ... (( المكان مكانك...والسوق سوقك ومرحبتين بيك ))

أغلب انواع الحوت كانت موجودة بجميع اشكلها والوانها ومسميتها .. وانى من السعادة تقول ندهور فى حديقة غناء بزهورها منها :-

البوقا,السردينة,ساورى,سوريلى,الدوت,الوراته,الشكورفوا,الفروج,كلب البحر,قراقوز,قاروص,تريلايا,مرجان.......الخ

ومنبيش نقوللكم على فواكه البحر ونسمى شوية جامبرى على شوية لبستر على شويتين كالامار..ولا قرنيط خلونى ساكته خير!!!!!

المهم ما شاء الله خيرات ونعمة ,, والى لفتلى نظرى اكثر شى الاجانب موجودين وبكثرة ومستمتعين جدا بسوق

الكلام يطول لكن الصور قد تكون أبلغ من الكلام..

الجمعة، 23 يناير، 2009

خبيزة زى البريوشة

السلام عليكم جميعا



انس... صاحب التدوينة الاصلية على خاطرك وخاطر خبيزتك قررت اليوم ناخد طريقة خبزة انس المظفورة ونطبقها ,,,,


لقيت حكاية المقادير شوية لخبطتنى ديسليتر وما ادراك ما ديسليتر!!!!

مشيت نجرى فتحت مدونتك وشفت الصور وقذرت بعينى ايه زيد اضحك نشبح فيك ,,

تبى الحق مرات تجينى حكاية التنبلة وتوه تشوف حركة تانية ذرتها صقع ...هههه

المهم الخطوات مشت مزبوط رغم ان حسيتها جتنى رطبة شوية ...

اعتمدت على احساسى فى الموضوع ومشى الحال ولما وصلت فى حكاية الطاجين ؟؟؟؟!!! اممممممممم الحكاية تبى طاجين كبير فكرت بينى وبين نفسى هذا توه شنو بيطلعنى للكوجينة التانية فى ها الصقع والريح نقنع فى روحى

باهى ديرى يا مى 2 طواجين ؟؟؟؟

لالالا مش فكرة بزيدوا يكثروا الماعين ,,؟؟!!

قلتلك ما تضحكش فكرت شوية وقلت والله لما نحطهم مع بعضهم وندير روحى ما شبحتش وحتى انت دير روحك ما شبحتش ...فوت مذققش فى الموضوع هههه ماشى

والنتيجة صورتهالك وتبى الحق جت طعمتها لذيذة رغم انى مش راضية على شكلها لكن معرفتش هيا خبزة ولا بريوش

؟؟؟؟؟؟؟

ملاحظات :-

1 / هذه اول تجربة يعنى خارج نطاق التقييم...

2 / زينتها بجلجلان والكتانية بديل لنوع بذور الى عندك ...

3 / شكرا يا انس وان شاء الله تكون نالت رضاك وستحسانك ...

4 / والباقى خليت التعليق للمشاهدين.... وان شاء الله واحد يقول مش حلوة,,,

على فكرة(( أمى)) من اول الناس الى علقت وقلتلى خبزة انس شكلها احلاه؟؟؟!!! فا خودوا راحتكم فى التعليق


وخيتكم مى
















الثلاثاء، 20 يناير، 2009

فضانية ولا حفل تعارف





التجهيزات


غرفة الاكل
للفاكهة نكهة اخرى



بوفيه مفتوح


المشقشقات
هداية عيلة العريس




السلام عليكم ورحمة الله


هذه التدوينة مؤجلة من تاريخ 20/12/2008 يعنى من العام الى فات ...

وسبب فى التاخير هلبة حاجات ومن اهمها احداث الى كانت فى غزة والى خلت الواحد معاش عنده نية فى شى!!

وتانيا الكسل وكل يوم نقول غدوة

المهم خلى نخش فى الموضوع المدة الى فاتت كانت عندنا مناسبة اجتماعية

(( فضانية)) بيان رجالة على مصطلح اختكم ((مى)) هل الفضان لبنت خالتى وبشكل اخر اختى الصغيرونة لنها اختى اقرب من ان تكون بنت خالتى ...بنت خالتى طويلة هلبة مبعدها؟؟؟!!!


طبعا من اول ما حدد الموعد

وامى وخالتى قالوا توه كيف بنديروا وشنو بنديروا ووين بنديروا وقداش بنديروا وهلم جرا,,,

وبعد تشاورات ومحادثات جانبية من قبل وزارة الداخلية قررالاتى:-

اسمعوا بنديروا العزومة فى الحوش والعوالة كلها فى الحوش

وطبعا الدوه على منو؟؟؟؟؟ على العروسة و مى واخواتها ؟؟؟ نهار والله مبارك

أمى تقول(( بالله الزمنى زمنى...)) وخولتى(( ترد حاجة الحوش ما يتعلاش عليها شى ..)) ويكملوا كلامهم وبعدين يشبحولنا ,,, وافهم يالى بتفهم

وطبعا حنى خضعنا للأمر الواقع وبدى الجرى.. على قدم وساق ,,,كل مرة نتفكروا حاجة مخليناش لا محل المواد المنزلية ولا محل الغدائية ولا محل الورد ولا محل تاجير الكراسى والطاولات ولا محل المكسرات ولا محل الشكلاطة ولا.....ولا........الخ

والفترة الزمنية كانت قصيرة فهذا يجبد وهذا يقلب وهذا يرد..


وبعدين فى اليوم الموعود ,, موعد اللقاء الأعظم مع الكوجينة,, وبدى فيها الجرى لكن والله ما نحكيلكم على كمية الضحك والبصارة والهياجة الى درناها خلال الاعمال الشاقة الى نقموا بيها وهى الى هونت علينا التعب

ومرة مرة نتلفت للعروسة ونقوللها هذا غير (( فضان )) مالا فى العرس شنو ناوية اديرى,,, تضحك

تقولى هذكا خليه فى حاله؟؟؟

قولتلها لا عارفه من غير ما تقولى ..انت قعمزى على التخت (( الكوشة)) وتعالى يا فلانة تراه ساوى مفرش الطاولة هذيكا وتعالى يا علانة خيركم قاعدين ما مدتوش الرزاطة ,,,,لين تفددنا ان شاء الله ..هههه

واخيرا جوا عويلة العريس وتلاقوا مع عوليتنا ومشت الأمور على خير ما يرام و احسن الاحوال وتمت بحمد الله كما اردنا...

وتوا فى الصور ما خليت شى الا ورتهولكم ,,,عيب عاد منقدرش نفوت عليكم شى حتى شنوا جابوا عيلة العريس معاهم مصورته !!


يا الاه ان شاء الله يعجبكم وعقبال الى مازال

السبت، 17 يناير، 2009

تتغير المسميات والموقف واحد






السلام عليكم ورحمة الله جميعا

أجتماع او قمة.... قمة او أجتماع لا زلنا نندد ونستهجن , نأمل ونتأمل , لن ولا ...ولابد أن ؟؟!!

وفى نهاية أخر كل كلمة تلتقى الأيدى مع بعضها فقط!!!

ليدوى صوت التصفيق محاولا جاهدا ان يطغى على صوت القذائف والصواريخ وصرخة أمهات ثكلى ...



مطالبنا ...اولا ... ثانيا... ثالثا...

اردنا ....اولا ....ثانيا....ثالثا...

رجونا ...اولا ... ثانيا ...ثالثا...

ولكن هل من مجيب ؟؟؟؟

يكفيكم يا أمة العرب تعدينا الألف ولم ترتوى أفواههم من دمائنا ...بل تقول هل من مزيد.....

أسد يصرح (( ان تصل متأخرا خير من أن لا تصل ابدا )) !!!!!
سليمان يوضح (( اجتماع اليوم ليس تكريسا للانقسام العربى )) ؟؟؟؟ من يرئسهم تحتمى تحته راية سفارتهم ؟؟!!!

الى متى يتسابقون على كلمات اكثر تنمقا واكثرها لمعانا ووقعا فى نفوسنا التى ملت أذاننا من سمعها قبل عقولنا .

وأتفقتم ألا تتفقوا نتيجة محسومة من قبل أن تجتمعوا بحضوركم او غير حضوركم ,,,, قد تتحدث الكراسى عن مللها لثقل جلوسكم فوقها ببلاغة أكثر مما تحدثتم ..

بين ساعة وأخرى , افتتاح واختتام .. أبدا لم تختصر معاناة 60 عام ولم أجد نهاية للبداية ..... سوى ان

طفل ورضيع غزة أبئ الأ أن يحمى العزة .