الأربعاء، 24 يونيو 2009

هل أنـا فى كوبـــا ؟؟





السلام عليكم ورحمة الله جميعا

ها قد أقدم الصيف بسطا ذراعيه مرحبا برطوبه و يحضننا بحرارة مهللآ بقطارات العرق التى تنثرها أجسدنا من لهيب الحر ...

تفكيرى فى تلك اللحظة أنحصر فى شئ واحد.. كوب عصير بارد

ولكن من أين لى هذا فى أزدحام السيارات وتكدس جموع من البشر
أتلفت يمينا ويسرا

وتقدمت خطوات لعلى اجد ملاذى وما هى الا لحظات ووجدت نفسى داخل هافانا


نعم هافانا ...

سئلت نسيم بلادى رفيقة دربى... هل أنا فى كوبا ؟!

بسم الله ما شاء الله محل متخصص بكل شى مصنع من الفواكه الطبيعية

أخدنا ركن هادى فى المحل الذى يتكون من طابقين ومن هذه النقط سأروى لكم ما حدث معنا بتفصيل:


ميوش ميوش شنو بتطلبى ...

رديت عليها انى خلينى توه نستمتع بمنظر والمنيو قدامى ... ولا نقولك خلى بناخد ايس كريم بنبداء بيه ...شويه وقلتلها شنو رايك نجربوا الحلو من عندهم امممممممم ولا نقولك ناخدوا كابتشينو ولا نقولك ... ولا نقولك ....الخ

المهم فى الاخير استقرينا على طلب معين



مى متريحش فى روحها كا العادة

وانى مستمتعه بطلبى جت فى بالى فكرة ندور صاحب المحل ونسئله ونستغل فرصة وجودى فى التعريف بلمحل ...

وفعلا هذا الى صار
صاحب المحل هما اخوين أنس و أحمد الاسطى ولكن للاسف الشديد مكنوش حاضرين فى المحل ومقدرتش نقابلهم

خالهم أسامة الفيتورى عوض عنهم فى حضورهم وكان هذا الحوار بيننا
انا المدونة مى صاحبة مدونة ماى كورنر

حبيت نسئلك شوية اسئلة على المحل لو معندكش مانع

وممكن تعتبرها دعاية ليكم لنه بنحط الحوار والصور كلها على النت



بصراحة رحب بالفكرة وتجاوب معاى...

الاسئلة كانت مش مجهزة لكن فرضت نفسها واولها كان :


لماذا هافانا ؟
ابتسم وقالى هافانا منطقة فى كوبا مشهورة باغلب الفواكه الى حنى نستخدموا فيها فى المحل.

ديكور المحل مميز يعنى تشعر وكانك فى غابة استوائية فمن كان المسئول على تصميمه ؟




الديكور هو مجموعة ابداعات من موهوبين ومكانش مسئول عليها شخص واحد...

حاولت نتعمق اكثر..العلامة المسجلة فى المحل هل هى علامة عالمية ؟

ركز فى سؤالى وكانى مسكت راس الخيط رد عليه.. العلامة هذى هى نفس علامة المحل الموجود فى كوبا مع اختلاف بسيط والسبب فى الاختلاف انه المحل الاصلى تنباع فيه العصائر والماكولات المضافة اليها الكحول لهذا اخدنا اذن اصحاب المحل الاصلى بتغير العلامة بشكل بسيط حتى تنسبنا حنى المسلمين ...


((ومتعرفيش ممكن بعد سنوات تولى علامتنا عالمية ومعروفة))

هل كل العمال اجانب اهم هناك عمالة ليبية؟

بسرعة رد عليه ..مخلطين عرب وليبين

هل لى هافانا فروع اخرى ؟

نعم فى فروع ومنها فى حى الاندلس ولكن تختلف شويه خدماتهم..غادى خدمات فورية ومش مجهز للجلوس فيه زى هذا

انتشار العديد من المحلات الاخرى للعصائر الطبيعية كا.... وكا ..... هل سبب فى قلة عدد زبانكم ؟

قالى بلعكس المنافسة الشريفة تخلى الانسان يطور من نفسه وحنى نحاولوا نكونوا الافضل

سيد اسامة هل قابلكم موقف طريف او غريب فى احد محلاتكم ممكن تذكره ؟

قالى اكيييييد واكثر واحد كان موقف صار مع زبونة اجنبية حاولت انها تراوغ فى دفع الفاتروة وتحججت بانه طلبها مكانش واضح سعره فى القائمة رغم انه القائمة مكتوبة بلغتين العربية والانجليزية ... امتصيت غضبها ووضحتلها ان السعر موجود ورغم هذا حنى منبوش نخسروك زبونة والفرق خليته على المحل

يعنى هذا أحيانا يطغى الكرم العربى فى ضيفتنا للأجانب ؟

أكيد دون شك ولو كان بلعكس لا اعتقد انى حنروح من المحل من غير ما ندفع الفاتورة كامله..

سيد اسامة وانا داخله الى المحل انتبهت لحائط ممتلئ بتوقيعات لمن تلك الخربشات ؟


المحل زواره هلبة منهم فنانين ، مبدعين ، سفراء وغيرهم فا اغلب من مر من هنى وقع ومخلى بصمة فى المحل.


هل فعلا كل المواد المستخدمة طبيعية ... يعنى مثلا المانجا والافوكادو وجوز الهند والباباى فواكه استوائية غير متوفر هنا فهل ليها بديل مثلا ؟

أجابنى وثقا...

كل الفواكه طبيعية وزى الفواكه الى ذكرتيها فعلا مش موجودة لكن نستوردوا فيها من السعودية او من كوبا وحنى نتعاملوا مع ناس متخصصه فى الموضوع هذا سؤال قد يكون غريب...


فى حالة زبون طلب منكم كوكتيل معين من خياله ...هل انتم على استعداد لتلبية الطلب ؟



جاوبنى ...بتوفر الفاكهة و الصانع مفيش شى صعب !!!

شكرا سيد اسامة لوقتك وانى سعيده جدا باستضافتكم

ملاحظة :-
الخدمات كانت فى غاية الروعة واهتمامهم بينا كان على أكمل وجه


مش تقولوا راهو خاطر دافعين فلوسكم لالالالا هلبة أماكن تدفع فيها فلوسك ومترتاحش فيها


هذا جل ما حدث معى ...وللصورة مذاق خاص بنكهة الفواكه

28 التعليقات:

may يقول...

السلام عليكم

التعليق الاول محجوز لأختى نسيم

نظرا لنها عندها ظروف معينة تمنعها عن التعليق الاول ليها

فقلت مش حنغير السبر ونحجز هولها لين تولى

ميووش

Αρετή Κυρηνεία يقول...

حرامممممممم يابنات ، سهفتنىى لاجواء الاستوائية وشجر جوز الهند والحاجات يلى زى هكى..بس كان ناقص تشوفى لو عندهم سيجار هافانى معتبر او لا ...مبسوطة انك طلعتى مع نسيم مشوار حلو ربى يسعدكن كمان ، طمنتننى ...يومك اروق انششالله

Anglo-Libyan يقول...

nice coverage :)

I saw this place on TV very nice, well done to them.

naohama يقول...

ميوش سهفتوني انت ونسومة سهفتوني انا والعزيزة ياسو :) ( المحيط)
علي كثر المطاعم ومحلات الايس كريم والعصائر هنا وكل مرة نجربوا واحد
ما يجن حذا واحد في ليبيا نستمتع فيه مع صديقات عزيزات اومع اهلي او مع زوجيالعزيز في جو ليبي صميم قديش انا وهو مرايفين عليه
حرام عليك
خطرها مقلتيش وين يقع هافانا في اي شارع من شوارع طرابلس !

غير معرف يقول...

السلام عليكم ..

المكان تحفة والصور خلتني نصصم إجازتي الجاية هنمشيلهم بعون الله..

عجبني سؤالك اللي قلتي فيه :

يعنى هذا أحيانا يطغى الكرم العربى فى ضيفتنا للأجانب ؟

===
الكثير من الأجانب يفاجأون بالطيبة والكرم العربي الأصيل .. حيث أن هذه الفكرة تعارض ما بعقلهم الباطن من صورة مشينة لنا كعرب بأننا إرهابيون همجيون لا نحترم الغير ..

===

عموماً شوقتينا لهافانا يا مي ..

تحياتي لكِ

التاجوري يقول...

و عليكم السلام و رحمة الله

سبحان الله يا مي الفترة الي فاتت كلمني زميلي بالشركة و قالي تعالى , جيته , عرضلي فيلم باليوتيوب و قالي قول المكان هذا وين , ضحكت وقلتله بليبيا وين يعني طبعاً يستهزاء , قالي فعلاً , كدبته قلتله وين , قالي مش عارف , قصقصنا من ضابط اتصال الشركة قاللنا مكانه و قاللنا ردو بالكم (**) اسعاره سياحية

صح كلامه مي

غير معرف يقول...

سلام

ميوش صحة صحة مقدما واللة جتنى نية نمشى لى هفنا بس خصارة الوقت متاخر توا هههههههههههه

انى عادة نمشى لى فرع حى الاندلس لى انا فى طريقى وانى ماشى لى العمل وطلبى المفضل هوا كريب بالعسل جربية ومش رح تندمى مع فروبى بى المكسرات اوووووو يمشى جوى مليح لا عند الغدى


بس فرع الاندلس مشكلتا مافيش مكان لى الجلوس فى طاولات برى ع الشارع والحق انى منحبش ناكل فى الشارع بايخة الناس يتفرجووو عليك

لى دلك نطر نقعد واقف فى المحل ونكمل طلبى ع السريع

ياريت ايديرووو مكان لى الجلوس جوا المحل


سلامات

Gigi يقول...

السلام عليكم
دمتي وفيه ياميوش
وماشاء الله والله أفضل واحدة تعطي فكرة علي هافانا
وشكرا علي الادراج المميز في الحديث وبساطة الاسلوب وروعة الصور اللي التقطيها وصحتين ليك ولنسوم
بجديات المكان مميز وانت زدتيه تميز
وتعرفي متأكدة إن أصحاب المحل ضاع عليهم نصف عمرهم لأنهم ماالتقوش بيك
والاخ أسامه سعيد الحظ اللي تكلم معاك وأنت إنسانه خير،وبوستك يوضح أصلك ونيتك الطيبة
دمتي مبدعه
أستودعك الله

غير معرف يقول...

هو وين المحل هادا؟ أنا نعرف اللي في قرقارش بس...وزي ما قال أنجيل ما فيش مكان وين تقعدي..الحق عمري ما نزلتله لأنه زحمة قدامه باستمرار...بس مرات خوي يصخف عليا يجيبلي منه حاجة هههههههه

may يقول...

اهلا اهلا محيطنا

لالالا انت غير ونسينا هنى ومتفوتكش عزومة فيه انى ونسوم والى يبى يتفضل معنديش مانع

نورتى بمرورك

مى

may يقول...
أزال المؤلف هذا التعليق.
may يقول...

Anglo-Libyan

thanx


yah.. its such a nice place & such a nice day

may

may يقول...

للوش

مش قلتلك يا تجينى يا نجيك وانى قاعدة نستنى فيك...هههه

لا بجد اول نزله هنى للبلاد ليك عزومة خاصة انت و محيط وطرابلس حتنور بحضوركم

على فكرة انى قصدا مذكرتش مكانه وين وتوقعت حد حيسئلنى فى التعليقات..

يا للوش

هافانا فى شارع امحمد المقريف فى قلب مدينة طرابلس

وخيتك ميووش

may يقول...

وعليكم السلام

اهلا بسيف ضيف جديد

نور ركنى بحضورك

وانا على مسئوليتى جربه هافانا الاجازة الجاية وانت مش حتخصر

شكرا لنك ركزت فى نقطه الكرم العربى فعلا نحن كرماء و جدا

مى

may يقول...

التاجورى اهلا

ايه هافانا فى ليبيا وفى شارع امحمد المقريف تحديدا واسعاره ليست بخيالية مقارنة باسعار المحلات الاخرى ..او باسعار فى احدى الدول العربية القريبة... او باسعار الدول الاجنابية

شكرا للمشاركة

مى

may يقول...

اسامة سلمك سلمك

ايه صحيح فرع حى الاندلس نظام تك اوى على الواقف

لكن هذا غير

ونبى نطمنك الكريب متاع العسل اوالشكلاطه متوفر حتى فى امحمد المقريف وبنفس الجودة

اختك ميوش

may يقول...

وعليكم السلام

يادى الكسوف ...ايه ذه يا جيجى

بجد اخجلتم توضعنا والله غير انتى تعرفى تستوعبى الناس ياودى يكثر منك وخلاص

واهو المرة الجاية بدل كاركالا نخلوها فى هافانا شنو رايك

السيد اسامة بصراحة كان فى قمت الدوق والاحترام

وخيتك ام الميش

مى

may يقول...

ليبية

هذا فى اخر امحمد المقريف بعد الجامع وانتى راكبه يجى على ايدك اليمين قبل مثلجات وحلويات القصر

اهو النعته بتفصيل الممل

ويوم تنوى تمشى تفكرينى

اختك ميووووووش

riyadh يقول...

ما شاء الله عليكم
ديما توازو في الأماكن الحلوة
بالله يامي تقدري تقوليلي على عنوان هافانا

holyday يقول...

السلام عليك
دعايه ممتازه
هههههههه


بس فعلا في اماكن تدفعي فلوسك وانت راضيه بل كامل رضي

بالصحه
ان شاءالله تفكرتني في عصي انانس انا نحبه

سلامي
اختك
فتاة من زمن اخر

may يقول...

الله يبارك فيك يا رياض والمكان وذكرته

وحاضر نعود تانى وحتى ميه

فى شارع امحمد المقريف

ميوووش

may يقول...

وعليكم السلام هولى

والله هو يستاهل الحق

نتفكرك ولاش لا

انت غير معاش تغيبى

وخيتك مى

Meme يقول...

سلام يا ورد

موضوع مميز كعادتك ميوش
المحل نشوف فيه بس ما خشيتلاش
بالك ندبسو المره الجايه جيجي فيها هههههههه
شنو لاباس على نسمه وينها ظروف شنو ان شاء الله خير

A. Alkasah يقول...

Hi May , It seems you had a nice day although Meme was not with you!! anyway I been there couple of times and it is lovely place. The most thing I loved about it is the design and the gadgets been put. Yes their prices are soo over , I remember they served me with a coffee but Wallahi the small casual coffee shop beside Havan do better and more tasty. I remeber I was there the second day of thier opening and I was told by one of the staff that they had Diana Carazon singing in the night before at a small opening party , I nodded,, Ohhh I missed it ,, coz I really love Diana.. awww I wrote to much im sorry, I wont be late again mayooosh.

لو عرفوه هيحبوه يقول...

السلام عليكم ورحمه الله وبركاته
الا تنصروه فقد نصره الله
: ان كنت تريد نصره النبى صلى الله عليه وسلم
فندعوك للمشاركه معنا فى حمله لو عرفوه هيحبوه لنصره النبى صلى الله عليه وسلم
نسعد بذلك

may يقول...

ميمى

لا حبيبتى حاولى تخشيله ومش حتندمى

وخلاص حنى فيه المرة الجاية ولا يهمك

ميوووش

may يقول...

دكتور اكس

شوف القهوة الى تتكلم عليها انت ما تنسبنيش انى كفتاة انى نقدر ناخد منها حاجة لنها ما شاء الله تقريبا دائمة الازدحام بشباب

وبنسبة للاسعار اعتقد انها مقدور عليها مرة مرة ...يعنى مش ديما صح ولا لا

شكرا على الملاحظة

خليك قريب

مى

may يقول...

وعليكم السلام

لو عرفوه هيحبوه

يسعدنى ذلك وبشدة


شكرا لمرورك هنا

مى