الجمعة، 19 مارس 2010

ميووش والليبية ثروة وطنية





السلام عليكـــم ورحمـــة الله جميعاً



وبما أن المزاج مش رايق والدنيا زحمة يا دنيا زحمة

قررت نخش للكوجينة
واندير اى حاجة نفش فيها خلوقى ( وهذه عادة محمودة ) يحبوها الحوش...

ميوووش ثروة كوجينية وطنية

وبمرتبة الشرف مع اكتظاظ واختلاط الاحاسيس والمشاعر !!!!


قلت بينى وبين نفيستى ما الاك الا..

لفافات القرفة الى تعرف عمايلهم البنية المدونة

Libyea


اختنا الناشطة الفالحة فى الكوجينة وما يحيط بيها

Cinnamons Rolls



وفتحت على صفحت الطريقة والمقادير والتزين والحشو و...و...

وكتبتها قى قصاصات صغيرة لصقتهم على باب الثلاجة ..


1- العجين:

7 جم خميرة جافة “خميرة بيرة”

½ فنجان ماء دافئ

½ فنجان حليب ساخن

¼ فنجان سكر

1/3 فنجان زبده

1 بيضة

1 ملعقة صغيرة ملح

فنجان دقيق

2- الحشو:

½ فنجان زبدة

¾ فنجان سكر

¾ فنجان زبيب+جوز

3- التزيين

4 ملاعق كبيرة زبدة

2 فنجان سكر ناعم

1 ملعقة صغيرة فانيليا سائلة

3-6 ملاعق كبيرة ماء ساخن

حضرت المقادير وبديت فيها

ومن ذكائى الحارق الخارق بدل ما نلصق الوريقات على الطاولة

الى نشتغل عليها لقيت روحى مدايرة نظام ..

أجعلك يا مادى بين جاى وغادى

ورغم هذا مستمتعه الى درجة نحس فى روحى بنطير طيارة من براجى


وانى نخلط اكتشفت حاجة انه فى الوصفة تقول فنجان دقيق وحطى نصه قبل الخميرة والنص التانى بعدها ...

ياودى دوة الفنجان اه اه شويه الكمية ملمهاش!!!

فخديت نقنع فى روحى هذا يعتمد على حسب نوع الدقيق يا ميووش

وعينكم تسلم من العمى وبلجهة المصرية (( عينك ما تشوف الا نور ))

زيد دقيق.. زيد اعجن ...

تزيد العجينة ترطاب بحكم كمية الزبدة الى فيها...

زيد دقيق... زيد الطين بله ...

الخولاصة ( على قولت جدى الله يرحمه )

تكورت واصبحت عجينة فى الاخير بقدرة المولى


وتوه وين بنسلك مع برنامج الخمير والفطير اممممممم

الجو مصقع يعنى بتاخد وقت اكثر فى التخمير وانى نظام لبنى السريعة

و معنديش الريح وين يدور مفيش حل

الا نلفها فى نايلو الحافظ ونغطيها بفيطة ونلف عيها البطانية

*_*


الفكرة جابت نتيجة مرضية وفى وقت قياسى

كملت باقى الوصفة من حل وحشو وستفتهم الدويرات ما بين طوجينين

واحد بطريقة الليبية زى الوردة

والتانى وحيدة وحيدة على اساس نبيها نفس الى نشرى فيها جاهزة من الركن الايطالى

ونرجعوا مرة تانية لفكرة التخمير

لكن البطانية مش حتمشى حالها المرة هذى و مع الطوجينات ...

مفيش مشكلة حطيت تحتهم صونيات امية سخونة تغلى وغطتهم ...

وستر ربى وامشى الحال

اخيـــــــــــــرًا غير اخر

اشقرت اللفافات وتحولت الى لونها الذهبى فى درجة حرارة ما بين 150-200 درجة

النتيجة كانت كالتالى...

يمى يمى بنة وصنة

(( شٌكار العروس امها وخلتها وعشرة من قبلتها ))


اما عن الحقائق الميوشية :-

1- حسيتها جت شوية ثقيلة مش خفيفة

2- وقت اعدادها يشحورك وخصوصا لو كان الجو مصقع زى امس

3- قبل ما نزينها قلت فى نفس بالى خلى نذوقها

لقيتها طعمتها حلوة هلبة فا متحتاجش زيادة سكرعلى سكر(( عقدة من الاخير))

4- منعرفش خيرنى الى جاينى جاينى على التصوير هى صورتين وخدتهم بالعافية !!!!

5- أى خلل فى النتيجة فا اكيد نتيجة ابدعاتى وخيالى العلمى وهذا

مما ينفى عن الليبية اى تهمة مغرضة

شكــــــــــــروون هلبة يا ليبية

ولا يأس مع الحياة ولا حياة لمن تنادى

وعندى فيها أن شاء الله محاولة تانية

الى متاكدة حتكون أحلى بعون الله

may

19 التعليقات:

Nasimlibya `√ يقول...

ثروة وطنية يا عنصرية انتي ثروة عالمية

وتى روحك للتعليقات
;)
1- خيره الزبيب لونه اسود هههههه
2- خيرهم اللفافات هكي العفو شنو نظام من الكبير الى الاصغر
ههههه

تعرفى لو منعرفش ابداعك الحقيقى راهو قلت راح مستر **********

بس خلى نطمن الشعوب العربية الدنيا لسه بخير وميوش تطير ف العين بس
^_*

may يقول...

السلام عليكم

صار هكى يا نسوم خيره الزبيب اسود انت شنو رايك شنو يولى لونه الزبيب بعد ما يخش الكوشة بالك موفى ولا ازرق هههه

وبعدين مستر 7 نجوم مراحش انت غير هفتى روحك :d

وبجد ومن الاخير ليك وحشة انت وتعليقاتك والترتيب الاول وخلى نردوا ايام ما قبل الحرب العالمية التدوينية الاولى ههه

دمتى اوخيتى

غير معرف يقول...

في انتظار الحجم العائلي
كلاكيت
ميووش والليبية ثروة قومية
تاني مرة

سلمت الايادي

Nasimlibya `√ يقول...

الزبيب يكون ذهبى مش اسود لان الاسود يا اما محروق يا متبزع عليه رب ههههههه

بعدين النجوم منبيش نتكلم عليهم
ايوة هكي خليك من صف المعجبين المرحبين

اني بصراحة قلت منبيش نعقد الجمهور بالعودة للمراتب الاولى بعد رحلتى للمحيط الشمالى فقلت وحدة وحدة حيتعودو على وجودي من جديد

المهم
الحرب العالمية التدوينية ايام الله لا يردها قولى امين


وهيييييييي عدنا والعود احمد ^_^

دمت منورة البلوق سبوت يا نسيم شكرا ميوش ;)

may يقول...

غير معروف...

شكرا لمرورك وتعليق المشج

مى

may يقول...

نسيم خيرلك راهو ...

!!!!

Unknown يقول...

ummy... next time'll b better..
lol..
but dont 4get my share Mayoosh
^_^

Meme يقول...

ههههههههههههه لا تعليق على الشكل و الزبيب خاصة بس الطعم انا متاكده طالما من تحت ايديات ميوش فماشاء الله عسل
سلم ايديك
لكن تعالي هنا الناس لما تتضايق تطلع تغير جو و انتي تخشي للمطبخ؟؟
صار ثروة وطنية و انا نقول وين مغيبه اتاري تنمي في مواهبك المطبخية

عودةة ميمونة ميوشة
اشتقنالك
نهارك سعيد

زنوبيا الشهــيبي يقول...

سلام مي
سلم ايديك وايدين صاحبة الفكرة

توا نجربها وندزلك منها بس بدون زبيب لاني ما نحبش وااجد

سي يو سوون

وشكراااا

حمـــــــــــــــــــــة يقول...

أنا أفكر أنا موجود
ذكرتني بها و أنا أقرأ ما جاد به قلمك
مع أجمل التمنيات و أنا أمر بليبيا الحبيبة

مهرة سالم يقول...

السلام عليكم ...
ماشاء الله عليك يا ميوووش
الطبخ بالنيه والله الموفق
ههههههه
....
يا لبنى السريعه إنتي
بسسسسسرعه ديريلي نصيبي إلى الإمارات
ويكون بالقرفه بارك الله فيك..
.....
في امان الله ..

may يقول...

فاتن

بعون الله كان درته مرة تانية حنقولك ونتفاهمو وين نتلاقوا باش نحسبك فيه ولا يهمك

واحنا كم فتون عندنا

may يقول...

ميمى

حى على الضحك اسمعى الحق وبينى وبينك مجاش زى ما نبى ومن الاخير زى ما تقولى خدمته مش بنفس هى مجرد فشة خلق

شكروون هلبة على التشجيع

وانا اشتقت لك بأكثر

may يقول...

زنوبيا هنى مرحبا

خلاص نحن فى الانتظار وانى حاسه عندك ذوق وحس عالى لطبخ ونفخ *__-

والشكر لك

may يقول...

hamma

اهلا بيك من اين ما كنت

مرحبا بك فى ركنى خصتا وكل ليبية عامتا

may يقول...

وعليكم السلام

اخجلتم توضعنا يا نهور

لالالالا

طلبية الامارات خاصة جدا وحنحط فيها كل جهودى للوصول الى الافضل

هذى نهار مش اى اى ولا زى زى

*_*

مى

holyday يقول...

السلام عليك
اهلا
كيف حالك
قصة فيها مطبخ
هههههههههههه


وله فكرة تتضايقي تخشي مطبخ
والله مانديرها ممكن مكسده مافيش حاجه تانيه

امهم صحه وتسلم ايديك
دامات تورات الوطنيه
سلامي
اختك
فتاة من زمن اخر

غير معرف يقول...

غير شن بنقول بس يا ميوشة..يعطيك الصحة وخلاص p: طلعتينا ثروة وطنية مرة وحدة؟؟؟ اللي يسمع يقول حق P:

ضحكت لين عييت على حكاية فنجان الدقيق المفقود...وكله كوووم والبطانية كوم بروحه هههههههه بنجربها الطريقة هادي المرة الجاية...لكن قولي اما نوع بطاطين استعملتي؟ بطانية نمر؟ P:

اما حكاية الطاجين اللي فيه مية سخونة هادا بروحه اختراع...يستحق انه تسجليه باسمك!!!

وتوة نجو لحكاية انهم ما طلعوش خفيفات...تعرفي علاش؟ لأنك يا بطة ما خليتش العجينة تاخد وقتها وترتاح...قالو خليها ترتاح يعني ترتااااااح مش المهم انها تخمر بس...ما تسألينيش شني السر في حكاية الراحة...لكن هما قالو هكي وانا تبعت طريقتهم وطلعت النتيجة زي ما نقولك...حاجة روعة... انا ملاحظة حكاية الراحة هادي ديمة تتكرر معاي في الحاجات اللي فيهم زبدة..زي السابليه والبريزي وبعض أنواع البشطكيات... لما تخلي العجينة ترتاح حتى لو ما فيهاش خميرة تجيك النتيجة احسن

حسني كترت على ما وصوني..هيا فتك بعافية يا ختي

ليبية

may يقول...

واخيرا جيتى يا حنة


وين كلينا وكملنا

وتحمدنا وتشكرنا


اما بنسبة لحكاية البطانية والميه السخنة لو انى اول وحدة انديرها معنها مليح بكل...

راهو مش بعد فترة تقولى هذى من اختراعى ايوه حقوق الميوشية محفوظة

*_-


نجو لموضوع الراحة

هنى الحق عليك

من جديد عددى ساعات الراحة لكل طريقة يعنى مثلا ساعة ساعتين 3

وزى ما قلتلك هى تجربة لم تكن مرضية لميوش قبل غيرها لكن اهو محاولة...


صحيتى هلبة

وربى يحفظك

اختنا صاحبة الايادى والانامل الذهبية

من اختك ميووش

ام الانامل الماسية