انا لأخى ناصحة

السلام عليكم ورحمة الله


عاد الى البيت غضبا حاولت ان اسئله ما السبب فنظر الى شزرا وعاد الى ما كان يفكر فيه ومع اصرارى حاولت ان الحق به وخصوصا عندما بدأت صوت التمتمات واضحة ولكنى لم افهمها فا زاد فضولى ؟؟؟ مما دفعنى الى السؤال للمرة التانية ... لهنى وياسر من اللغة العربية الفصحة توه بنتكلم بليبى...

(( خيرك شنو فيه ؟)) قالى (( الى يسمع كلامك ويتبعه يستاهل ما يجيه )) تصدقوا خفت قلت شنو مدايره من عملة؟؟

ماهو انى عمايلى ومقالبى هلبة وزادت بكثرة هل يومين وهذا اعتراف صريح... باهى توه نزيد نسئل ولا نسكت لالالا نسئل وهى تكشيخة وحدة يابيها تجى للقدام يابيها تمت عليه

المهم حاولت نكون لطيفة وغيرت طريقة السؤال ونبرة الصوت (( لا باس عليك يا وخى شنو فيه والله شغلتلى بالى؟؟!!))

قرن حواجبه وقالى

هذا المصرف الحلو متاعك الى قلتيلى غير حسابك فيه.. وامس عام وانت تقنعى فيه بيه على اساس اهو قريب و.....و..... واليوم مشحط فيه قريب ساعة او اكثر بس خاطر بنفتح حساب عندهم


تبو الحق كتمت ضحكتى وزادت شهيتى للفضول فقلتله (( خيرهم شنو دارولك غريبة رغم خدماتهم سوبر على الاخر )) ههههه وكانى اصبت الهدف

وقف وقالى سوبر!! صار سوبر

الموظفة تقولى عندك موافقة من مكان العمل نرد عليها ايه تفضلى تقولى مختومة نقوللها ايه هونا قدامك اشبحيها ترد عليه باهى لحظة تمشى عام معاش تولى بعد ما ترجع تقعد تشبحلى لين نسئلها شنو صار ... ادير فى روحها مسمعتنيش وتشورلى بيدها على اساس تتكلم فى الموبايل

على طول فكرت نزيد نستفزه بالاسئلة...باهى مشيت لحد تانى مش المصرف مليان موظفين..

قالى.. وانى شنو تحسبينى ستنيتها مشيت لوحدة تانية قلت ما شاء الله شكلها خدومة وبعد ما انتبهتلى انى موجود قالتلى (( تفضل يا استاذ ... استاذ استاذ مش مشكلة المهم عبرتنى )) ونفس الشى اعطيتها الورقة قلتى (( هى دقيقتين ونخدمك حاضر )) انت غير تفضل تريح وبس ؟؟؟

وتحولت الدقيقتين لعامين ولما وقفت عليها قالتى (( معليشى انت شكلك مستعجل وحنى قاعدين ما فطرناش !!!!!))

خديت ورقتى وطلعت والى يسمع كلامك توه يربح ؟؟!!

خلاص انى فى اللحظة هذى بذات عيونى من الدموع لين معاش يشبحوا وانفجرت من الضحك...

قلتله وسع بالك تعيش وتاكل غيرها... امممممممم باهى صورتهم !!! نزيد نشحن فيه هههه

رد عليه قالى (( امكان أمنى يا بنتى.. رغم انه الفكرة جت فى دماغى والكاميرا فى الشنطة لكن فت الموضوع))



بالله بنسئلك انت كيف تتعاملى معاهم لما تمشيله؟؟!!

قلتله سهلة وبسيطة (( قبل ما نمشى نحسب انى بنقعد على الاقل ساعة فيه وبعدين نحاول نمشى فى نصف الشهر يعنى لما الناس كلها استلمت رواتبها واخر حاجة نشهد قبل ما نحط رجلى فى المصرف وكان طلعت سليمه نشكر ربى وندعيله على اتمام امرى فى خير ما يرام وخلاص ))

قالى باهى كيف اديرى كان اطريتى تسحبى فى أول الشهر.... قلتله هذكا يوم متسئلنيش عليه تقول يعطوا فيه من جيوبهم ؟؟؟

يعنى منعرفش بلحق خيرنا الليبين ولينا هكى معاش فى احترام لا للكبير ولا حتى للصغير و معاش فى قدر للمرأة ...... الا ما رحمه ربى

كان الله فى عون الجميع وخصوصا الناس الى عندهم حساب فى المصرف الى منبيش نقول اسمه


ملاحظة : الاسئلة الى متوقعته الاتى


1- لاش متغيريش مصرفك ؟؟؟؟ تصدقوا والله مانى عارفه لاش شوره مخفش الميه والملح من عندهم مزال


2- استعملى الة السحب ؟؟؟؟ فاسدة

دمتم بخير و سلامة