السلام عليكم ورحمة الله جميعا
رجعت ريونة من المزرعة وهى تنادى
(( عميمة عميمة ... شوفى شنو جبت معاى ؟؟!!))
يا ساتر خدانى التفكير فى المفاجاة لثوانى.. زعمك شنو جايبه معها هل المرة !!!
دخلت تحمل كيس والابتسامة تعلو مُحياها ...
تراه قولى يا عميمة شنو جبت معاى؟؟؟
دق ناقوس الخطر وزادت تسارع نبضات قلبى وقلت بينى وبين نفسى
(( يا الهى يبدو انها خارقة قادمة فى الطريق ... خارقة يعنى مصيبة ))
راودتنى بعض الافكار والخيارات مرت على كمرور السحاب ..
ولكن بعد تدقيقى وتمحيصى لذلك الكيس الورقى المرفق بصوت خربشات مريبة
ادركت ان الخطر قادم ....
الفئران قادمة احموا الناس من الطاعون...
ومع اتساع عينى ريونة وازدياد بريقهم
سكن الصمت ارجاء المكان و حاولت ان اتنفس الصعداء...
واخير انفتح الكيس الذى كان خلف ظهرها
وتمسك ريونة بمفاجاة ... (( افتحى ايدك يا عميمه حاجة مليحة ))
تصبب منى العرق .. (( يا والله نهار مبارك وخلاص ))
اسمعى عميمه نقولك حاجة ..غمضى عيونك احسن
مع ابتسامة مغصوبة على وجهى المصفر
وبصوت معذب.. قلت
ريونة.. ارحمينى بالله عليك شنو الى جيبتيه معاك
ضحكت وقلتى متخافيش هادى فكرونة حلوة وصغيرونة ... راهو متخوفش يا عميمة
الحمد لله زالت الغمامة
فعلا كانت فكرونة (( سلحفاة )) فى غاية الجمال
قالتى توه بنديرلها حوش
وبعد شوية نادى عليك ونعزمك تشبحيها وهى فى حوشها الجديد
ذهبت مسرعة لتقيم بيت صديقتها الجديدة التى اطلقت عليها اسم (( جوجو ))
مرحبا بك جوجو نورتى المكان ونتمنى لك اقامة سعيدة فى بيتك الجديد
...................................................................
هذه التدوينة هدية خاصة جدا لصديقى السيد anglo-libyan
38 التعليقات:
اول
تعليق
لـــــ لــــــيـ نسيمـ بيـــــا
بصراحة
مفاجاة حلوة هلبة
وبالفعل فكرتينا بالسيد انجلو
قداش فكرونة صغنونة حلوة
:) كل يوم بنقولك كيف حال غزة و جوجو
شكلها حلو الفكرونه
بس الحوش مش هيبقى كبير عليها
هدية حلوة جدآ
بارك الله فيك وفي العزيزة ريونة بس قوليلها لازم تغسل إيديها بالصابون بعد ماتمسك الفكرونه بسبب ان السلاحف تحمل مرض السالمانيلا
جوجو تحتاج لأشعة الشمس وانشاألله تسعدكم جميعآ لمده طويلة جدآ :)
Jojo is a rare Libyan Tortoise (T. Kleinmanni)
look after its a beautiful little creature :)
مبروك الفكرونة بس خلوها تهيج في الجنان بحدا الغرس ياميوش في التراب لأنها تحب الشمس مثل مقال انجلو
باي
السبت الماضي لقيت فكرونتي في جنان لاني كنت ندور عليها منذ فترة طويلة و لقيتها بصدفه في صبح و هي تخربش في العشب و كبرت.
و كنت موصيه مجموعه من الاصدقاء لو كان يقدروا يجيبولي فكرونه صغيرة بس لحد توا ما لقيتش وحده بيش تقعد مع توتو.
آنستكم جوجو يا ميوش...لكن لازم تجيبلوها صحاب "جوجوات تانيات" يونسوها.. وزي ما قالولك طلعوها للجنان لأنها تحتاج للشمس...لكن ديمة خليها قدام عينك ...زمان كانت عندنا فكرونة خليناها في الجنان أختفت...وبعد شهور طلعت في حوش جيراننا ههههههههه
السلام عليكم ورحمة الله وبركاتة
انستكم جوجو يا ميوش
انا عندي الوالدة فى الحوش عندها فكرونة مهتمة بيها اتوكل فيها وتشرب فيها كل صبح مرات انروح انقول للوالدة حطيلي الغداء وهي طبعا اتوكل فى الفكرونة اتقولي اشوية بس نقعد انركب عليها حطيلي الغداء ...اعتبريني فكرونة جيعاااااان
تقعد تظحك
طبعا الوالدة اتحب حتى الطيور عندنا جارنا باني حوشة على الرابع والجزء الملاصق فينا مش امليس فى حفر فى الحائط فدائما الطيور اتعشش فية فمرات وخصوصا فى شهر 4 ايطيح عصفور اصغير ما يعرف ايطير فى المنور تقعد الوالدة تمسك فية وتشرب فية ومرات نتجمعوا فى الشباك انتفرجوا على امة وهي نازلة اتوكل فى ولدها ( سبحان الله قلب الام) انقول للوالدة شوفي يا امي غارت منك جت اتوكل فى ولدها المفروض هي اتوكلنى بيش اتغاري واتوكليني هههههههه
دمتى مبدعة يا ميوش
ما شاء الله
براءة الأطفال و حبهم للحيوان
أبارك لكم هذا الشعور النقي و الطبيعة الصافية
ذكرني سلاحف جلبها إبني كلما سنحت لنا الفرصة للخروج معا في نزهة وسط الجبال
أو إنتشال واحدة بصدد شق الطريق أمام السيارات
وضعها بحديقة البيت وكل مرة يعثر على إحداهن بعد إختفاء " لمدة نائمة"
سبحان الله
فكروووونة!!
زمان في حوشنا القديم كانت عندنا فكرونه ,كنت مدايرتلهاعمليات تعذيب
زي الدجاج حتى هو زمان كنت ناخذلك الدجاجه المغرب المغرب ونطيح فيها ضرب وهي علي قولة واك واك ..او واق واق حقه هههههه بجدبات مانبصرش ..كان الدجاج اول مايشوفني يقول فرت ههههه
مش عارفه شن العقد الي كانت عندي ..
لكن قاعده نخمم شن درت للفكرونه نسيت ؟!!!
لكن قنين حوش الفكرونة والله ..حتى اني مالقيته ^_^
خطرها يا ميوش انا حاسد جوجو بصراحة فى يوم انحلت مشكلة السكن عندها
يناري علينا اللى اندوروا فى سكن مش امحصلين
اعتبريني جوجو يا ميوش وسكنيني
هههههه
was lovely, what are you feeding it?\
آنستكم جوجو..هههههههه
وطبعا يا ميوش قوي قلبك مرة ثانية.. اخرة الخلعة هاذي كلها طلعت فكرونة.. P;
طبعا ما عنديش خبرة في تربية السلاحف..
لكن اهو كنت نتفرج علي "مغامرات بسيط وسريعة" في صباح الخير اول جماهيرية..
وكان تبي اي استشارة تو نبعتلك الحلقات مسجلة... ههههههههه
تدوينة رائعة ميوش
السلام عليكم
هدية جميلة لعميمة بس تبي الحق اني ما نعرفش نربي الا القطوسة بس ...هههه
بوست اكتر من رائع و عجبني هلباالاسم و كدلك حوش الفكرونة ههه
سلام و بالتوفيق
أحلى حاجة في ليبيا عندما يحاول أحدهم التهرب من المسؤولية فيقال له :"فكنا من جو الفكارين اللي تدير فيه". فكرتيني بمسلسل مبروكة ومحظوظة "الفئران آتية..احموا الناس من الطاعون".
دويناتك جميلة وخفيفة الظل
نسوم وكما اعتدنا الصدارة
حتى وان كريها ....
وجوجو وغزة يسلموا عليك
شكرا
مى
رومنسيى
لا كبير ولا حاجة هو كلوا يومين بكثير وننقلوها للفيلا الجديدة
ههههه
شكرا لمرورك
مى
سيد انجلو
وفيك بارك الله المهم الهدية عجباتك
وشكرا لنصائح
وخيتك مى
غير معروف
شكرا على النصيحة
وحنحاولوا ان شاء اله نقيموا بيها
مى
نونا
مبارك عودة فكرونتكم الى ارض الوطن سالمة
وصحيتى على تعليقك
نور ركنى بيك
مى
هههههه
ليبيا هنى معنها الابتسامة لن تفارق وجهى
اهلا..
وكل واحد يخلى بالو من فكرونته
شوفى لما يبقى الفكرونة الواحدة بكام فى الجمعية...ههههه
سرك الله كما سررتنى بحضورك
مى
اخى سراج
اهلا
ربى يحفظلك الوالدة ويحفظكم ليها
قول امييييييين
شكرا سراج للمشاركة بكلماتك المشجعة
وخيتك ميووش
hamma
شكرا لاسلوبك الاكثر من رائعة
انتظر دائما تعليقك بفارغ الصبر
مى
هنو...
تخيلى فكرووونة
وفوقها حلوة وسمحونة زى صحبتها ريونة
خلاص شوية وبنكتب فيها شعر
صحيتى على تعليقك
تعرفى انت ما يحلى المكان الا بفوصلتنا
مى
سراج
توه انت يا نارى عليك
هذه الكلمة بدات مش ليك؟؟؟؟
تبنى فى العمارات وتقول معنديش حوووش
ولا خايف نقولك نبى شقة
ههه
خليك قريب ومتغيبش
مى... منسيتش وخيتك
دكتور اكس
شكرا لمرورك وحضورك
بارك الله فيك
مى
فتون
ازهر المكان بحضورك
حتى انت من جماعة بسيط وسريعة ايييييييه يا حسرة
قولى هو كان عندنا خيار غيره
هههه
شكرا عزيزتى
ميوووش
اس اس الى
رغم انك ديما متاخر لكن يقولوا ختامه مسك..
عجبك الاسم
والله ماك مخليه فى خاطرك وسمى قطوستك عليه
والحوش شوف سراج ممكن يعرف يدبرلك واحد
صحيت على التعليق
ومعاش تغيب
مى
سيد عبد الدائم
جملة فكنا من التفكرين انى اول مرة نسمع بيها ...
لكن مش بطالة
ومن ينسى مبروكة ومحظوظة.. ايام
زيارتك لى فى ركنى ادخلت البهجة والسرور الى
شكرا
مى
انني من محبي هذا الكائن الغريب وعندي حوالي 25 فكرونة اجمعها واحميها من الانقراض .. فهي تهرب الي دول الجوار لذا فاعداده تتناقص بشكل مذهل
ناجي
ويا ريت يا جماعة الخير نطلق حملة للمحافظة علي هذا الكائن النادر لحمايته من من التهريب للخارج وايجاد بيئة واعية تحافظ عليه ...
السلام عليكم....
مرحبا بالفرد الجديد.....
ههههههه
أكيد شكلك تحفه وإنتي في إنتظار الفاجعه أقصد المفاجأه...
........
أضحك الله سنك ...
ذكرتيني ...
بالفأران قادمه إحمو الناس من الطاعون...
أيام ....
..........
دمتِ بخير
يا سبحان الله امي الايامات هادي تقول مش كانا عندنا سلحفاه راهي نطيره علينا الكساد
لالالا مش ليا جو الحيوانات الاليفه او على الاقل هكي امي تقولي
نهار
وعليكم السلام
اهلا
بارك الله فيك على الشعور الطيب
هى قفشات من مى
ميمى
ايوه حنى سلحفاة منين الاخت ؟؟؟
قولى فكرونة شنو سلحفاة
ههههه
ربى يخليلك اميمتك
ميووش
مبروكـ عليكم المزيود
اكتر شىء مقتنع بتربيته " الفكارين " باعتبار انى ما نحبش اغل الحيوانات التانيه ...
ميوش لو تبى نعطيكـ " رفيق " بدل ما مكسد بروحه فكرونكـ
ومش حنقولك قداش واحد عندى ..
ســـلام
يبارك فيك يا عبد الله
وان شاء الله نشفوا عندك
انى موافقة بنسبة لموضوع الرفيق
لكن اسمع فكرونتنا بيضاء وعيونها خضر وشعرها اصفر وتخدم ...
يعنى بنشرطوا عليكم الذهب كامل والبدلة الصغيرة والكبيرة والمتوسطة
وحوش بروحها وملك مش ايجار
خاطر حوشها هذا الى ساكنة فيه توه ملك ليها عطهولها بوه متفرطش فيه بتاجره استتمار...
مع قفتها اخلعها بهدية سيارة انفنتى ولا بى ام دبليو
ومخسهاش من فيلو تصميم هانى البحرى او الى صعب على اقل تقدير
حفلتها شوف اخر واغلى هوتيل فى طرابلس باش تحجز فيه 7 ايام كاملات
وعاد فى الاخير حتى دورة فى ماليزيا وقبرص وفرنسا متفسدش
ههههههههههه
هذه هى شروطنا بس بس
حق تفكرت حاجة ما قلتهاش على سبيل السبر وعادات
((المهم فكرون ولد عيله ولد ناس وخلوق ))
ههههه
شكرا على الحضور
ومتغيبش عبد الله
منستغنوش
وخيتك ميوووش
إرسال تعليق