السبت، 30 مايو 2009

لقاء الاشقياء



السلام عليكم ورحمة الله جميعا


القاء كان فى موعده فى نفس المكان وفى نفس التوقيت

اوله تودد وانسجام وسعادة مع ابتسامات وكلمات رقيقة بهمسات تكاد لا تسمع...

وماهى الا لحظات حتى تتلامس الايدى... وبمرور الوقت تزداد حرارة الشوق...

ثوانى وتتعالا الصرخات مدويه تعلن عن الذروة فى قمة المتعة ...

وعندها فقط ...التفتت الأمهات وقد علمت ان الأطفال لايمكن السيطرة عليهم وهم فى أوج نشاطهم وشقاوتهم..

صورة سريعة وبلعكس

نرجع من الأول ..

نسوة تتجادب اطراف الحديث فى بيت فاطمة ...

((على)) ياتى مسرعا الى والدته وهو يقفز اقرب من ان يكون ماشيا ...


ماما نبى بشكطى (( بسكويت )) وشاهى... والى حطين منه كله ... جععععان

الأم يتلون وجهها كاشارة ضوئية بجميع الوانها وبصوت خفيف مخنوق وضحكة مغتصبة.........

حاضر توه نعطيك غيرأمشى العب مع صحابك شوية باهى .....

تتعذر عائدة لتصرف ابنها (( سلامته وله شويطين بكل ما شاء الله عليه ))

وترجع عائدة بالخوض فى الحديث مع صويحبتها وتنسى طلب ((على)) المسكين وما هى الا خمس دقائق ويرجع

(( على)) ومعه صديقته (( حبيبة)) الطفلة ..الاصغر سنا وقد اتسخ فستانها بقطعة الشكولاتة التى كانت تاكل من نصفها وتلعب بنصفها الاخر

وما ان راتها امها مريم...

حتى نهضت مسرعة وهى تصيح (( خلاص بتكلبى معاش لقيتى شنو اديرى امشى فيسع قدامى نغسلك ايديك ))

فاطمة صاحبة البيت علقت بصوت فى داخل نفسها

(( ها البلاوى ما يجيوش الا بلعين الحمرة و بضرب راهم يهفتوا ))...


منيرة الرقيقة كان ايضا لها دور فى هذا الحوار....

انى وليدى ريري * اسم الدلع لرامى * مهبلنى بطير ويجنجن على خاطر البلى ستشين ولما شريتهاله فككها طرف طرف

لهنى وخلاص كملت اللقطة ..

بنوقف شوية على بعض المصطلحات المتداولة بيننا ..



شويطين : تصغير لكلمة شيطان (( وبعدها سلامته ولا ما شاء الله )) خوفا عليه من ان يصاب بالعين ويصبح ملاكا ؟!

بيكلب : وهو فعل من جدر كلمة كلب (( حاشه خلقه ))

البلاوى : جمع بلوة وهى مصيبة مصبرة قد حلت بينا (( لاحول ولا قوة الا بالله ))

مهبلنى : ماخوذة من كلمة الهبل فقدان العقل (( عفانا الله واياهم ))

يطير : فعل مخصص لبعض الحيوانات اوالاختراعات كا الطائرة

يجنجن : أصلها جن او جنون.. يعنى ما خير من ام الخير


شخصيات التى فى الفيلم جميع اسمائهم مستعارة

وان كانت موجودة فى الحقيقة... فهى خطأ مقصود وليس مجرد صدفة

33 التعليقات:

Nasimlibya `√ يقول...

اول



تعليق



وللتدوينة الالف بعون الله


ولى عودة ان شاء الله

غيري الاسم ارجوك الا هذا ايوة حطي اسم واحد ثاني


نقولك سميه(( سعيد))

LiLy يقول...

ثاني تعليق :]

LiLy يقول...

فعلا هذا اللي صار..الله يهديها النوعية هذي اللي لما تمشي زيارة بصحبة الـTeam متاعها (ههههه زي مامسميينهم اني و اختي)
تتبنى اللامباة طول فترة الزيارة
على الاقل "مريم" اخدت بنتها بتغسلها ايديها..لان العرض اللي نوشف فيه ان الام ولا على بالها
و المشكلة انه نحن عندنا في البيسمنت دار هكي كبرها اسمها البلاي رووم و معبية العاب و مع ذلك تلقيهم في ديار النوم...شني ايديرو غادي هذا اللي مش فاهمته

طبعا لا اعمم في كلامي بس الكفة تميل للنوعية اللي تكلمت عليها

عموما موضوعك ع الجرح زي مايقولو

في حفظ الله

LiLy

حمـــــــــــــــــــــة يقول...

السلام عليكم و رحمة الله وبركاته
حركة الصغار مؤشر جيد يعبر عن سلامتهم
و نموهم الطبيعي
صحيح أحيانا ينزعج الكبار لكثرة الهرج خاصة إن إلتقوا مع بعضهم و كل واحد يبرز نفسه
و لكن طريقة تربيتهم تبقى مسؤولية الأولياء (الأب والأم معا)
هنا ذكرتني في ظاهرة كبيرة حين يلاحظ الولي التغيير على أبناءه حين يلتقي مع أقرانه...
الأكل الذي لا يحبذه بالمنزل يقبل عليه مع أقرانه بشراهة
هنا سرا إلاهيا في فهم الصغار لبعضهم
بسهولة
هم أمانة في أعناق أولياءهم فلا مجال للنرفزة أو التهور برد فعل عنيف

romansy يقول...

قصتك جميله لان فعلا الاطفال ولعبهم بيفكرونى بالامل اللى جاى بكره
لعب الاطفال مرح وحب ان شاء الله تبقى حياتنا مليانه حب
فكرتينى بايام الطفوله يا مى

Αρετή Κυρηνεία يقول...

المشهد جميل جداا، ومضحك ومعبر فى نفس الوقت عن تعاملنا مع اطفالنا،نحتاج لاعادة النظر فى طريقة تعاملنا معهم فالطفل رغم مشاكساته وشغبه وشيطنته الا انه اذكى بكثير مما نتخيل ...تدوينة حلوة من طفلة كبيرة تكتب عن عالمها ..مودة خالصة لله

Nasimlibya `√ يقول...

ههههههه


طبعا الفيلم معندي منقول فيه مية مية اخراج وصورة وحوار وممتليين غير الولد على هذا بس حرام الحق مفروض اسمه اسم تانى الحق

;)

نجو لحاجة تانية


مشهد الام مؤترات صوتية مختلفة من
ووووواك ووووووه يا حليلي منكم


هو المؤثر طويل شوية بس اني اختصرته لان النشرة متع التانية عشر قريبة خير متجي الرقابة وتقصه


الصغار يجروووووو في حركة هاربين من الام

وهي بصوت مليان حماس وحيوية لدرجة الجيران كلهم يسمعو


يرزيني فيكم ,,,,,,,, ان شاء الله نسقدكم مع بعضكم ف يوم واحد يا همي فددتوني قداش بنقعد نسيق ف جرتكم
انطمروووو وانتو تقول..............





هههههههه مشهد ظريف ولطيف جدا

التربية الحديثة بين الارشاد والتطبيق

نلتقي

Bumedian يقول...

السلام عليكم...

تنطقل منا تعابير احيانا لا نريد قولها ولكن نريد ان نملاء فراغات في حديثنا فتنطلق تلك الكلمات ...
مع ان هذا ليس عذرا لام او اب او صديق لان ينعت احدا بالنعوت التي تستعمل و ينعت بها الاطفال خصوصا ...
هل يغيب على عقول الامهات بان هذا هو حال الاطفال؟
ام انهم يهملوهم و يبو منهم يكونو عقلاء وفاهمين ويقدروا المواقف؟؟
طيب الصغير جاع او اشتهى ما يوضع امامه؟
اعتقد ان احد اسباب ذلك انه الامهات لم يعتدن على تقديم وجبة الاطفال بالطريقة التي يحرصن عليها عندما يقدمن الطعام للظيوف؟ وتلك الطريقة المشهية و التي الاجدر ان تتبع دائما او تترك دائما لكي يعتاد الاطفال عليها...
و غريب فعلا كيف تنسى الامهات والاباء بان الاطفال بطبيعتهم نشطين ولا يعرفون الا ان يفعلو ما يخطر ببالهم ، و تعليمهم هو مسئولية الام والاب ..
لكن عطهم دعوة مكاليب :))

ولكن من يعرف التعامل معهم هو من يحسن التصرف و التفكير بعقول الاطفال و يذكر كيف كان هو ذاته طفلا ...

والتعامل مع الاطفال بالعقل و المنطق اصح طريقة للتواصل معهم و الابتعاد عن اسلوب التصغير واعتباره لا يفهم و اشعال الغضب مباشرة ... ينتج عنه ...
المسطلحات التي ذكرتي ...

شكرا لك ،
تحياتي

may يقول...

اهلا

بنسومة وبتعليقها الاول

ولتدوينة الالف يودى هذى هلبة عليه

هههه

الاسم حلو الحق لكن للاسف منقدرش نغيره حقوق الطبع محفوظة

ميووش

may يقول...

LiLy

اهلا بيك وكلامك صح وعن تجربة..

ما تحلوا اللعب الا فى المكان المرتب والمخصصة لضيوف

وحكاية الا مبالة خليها فى حالها

تلقيها فى حوشها منظمة ومرتبة ووليدها ولا بنيتها ميبستهم فى تركينة

ومجرد ما تطلع وكان يا نارى خدوا افراج ليهم وليها

شكرا على التعليق نورتى

may يقول...

hamma

شكرا على كلامك وصدقت فى ما قلت

وربى يبارك فيك

may يقول...

رومنسى

اهلا نورت ...هى مش قصة بقدر انها واقع

دمت متتبع

ويا رب نشوف عيال عيالك

ميوش

may يقول...

Αρετή Κυρηνεία

بصدق بديت نستنى فى تعليقات المميزة صحيتى وكلامك معندى ما نلوح منه

الطفلة الكبيرة الصغيرة تحيك وتدعوك دائما لزيرتها فى ركنها الوردى هذا

مى

may يقول...

نسوم بنسبة للاسم خلاص طلع الموضوع من ايدى

وباقى الفيلم بصراحة يكمل عندك

هههه

ضحكتنى بموسيقة التصويرية

ويارب نشفوهم عندك عن قريب

ويقعدوا يقلبوا فى الدنيا ويعيطوا ويقولوا نبو خلتنا ميوش الصقع هى بس الى تفهمنا هههههه

اختك الصغيرونة ميووش

may يقول...

Bumedian

وعليكم بافضل مما سلمتم

رايك صحيح وكلامك زينة العقل ولكن يبقى التنفيد

المشكلة فى التنفيد وخصوصا فى الاوقات الحرجة مش وقت الوساع

والله يا خوى مرات مواقف تصير قدامى ونعوت تطلع من افواه الأم والأب تندى لها الجبين

وبعدين يقلوا الصغار منين جابوا هل الكلام

...كيف وهما تربوا عليه

شكرا لمرورك

مى

siraj يقول...

السلام عليكم ورحمة الله وبركاتة

والله يا مي ما عندى ما انقول هو الواضح انك كنتى في لمة وفيها جمع من النساء والعيال دارولك صوداع وجيتي هنا فى مدونتك وفرغتي الشحنة المكبوتة
ههههههههههه

لكن مش راح انقول افضل من قول الله تعالي

المال والبنون زينة الحياة الدنيا


وانا عارفك من خلال الصور اللى فى المدونة انك اتموتي فى الاطفال ان شاء الله يا رب انشوفهم عندك وربي يرزق كل محروم بهذة النعمة

غير معرف يقول...

سلامات

هههههههه فكرتينى فى امى قبل جميع المصطلحات تستعمل فيها

بس مرات تقولى ياعطيك حمة ههههههههه

ولاما تجينى الحمة مسكينا ماترقدالليل ههههههههههه


سلامات

S.S.Ali يقول...

السلام عليكم

ههههههههههه ضحكتينا هلبا يا يعطيك السلامة ..

الحكاية هادي واقع نعيشو فيها كل يوم و المفردات اللي ذكرتيها جزء بسيطة من بعض المفردات و الكلمات اللي موجودة في عباارتنا و للاسف معانيها تجلب لنا المعصية يعني معقول نقولو على طفل كلمة "شيطان" الله يبعده ...

بارك الله فيك اختي و دمتي مبدعة

سلام و بالتوفيق

may يقول...

وعليكم السلام والرحمة

ايوه حنى وخى سراج صار دارولى صداع...

الاجابة خاطئة

لا بجد سراج المنظر هذا اكيد مار على الجميع

ان شاء الله وانت ماشى لسوق اكيد صادفك ولو جزء منه

عموما

شكرا لانك عرفت ما مدى حبى للاطفال.. وان شاء الله نشوفوهم عندك وعن قريب

نور الركن بحضورك

وخيتك الصغيرونة الصقعونة ميوش

may يقول...

اهلا

لالا مدام الدعوة مستجابة خليك باهى معها باش تدعيلك دعوة الى فى خاطرك ويصير منها بكرى بكرى

شكرا

ومغيبش

may يقول...

اس اس على

بارك الله فيك

المهم المقصود حصل

و خايك قريب ومعاش تتاخر

مى

Meme يقول...

هههه حسيت روحي قاعده في لمه من اللمات العائليه
معاك حق المفردات مش صح بس الله غالب هادي لهجتنا اللي خدينا عليها الاغلب مايعرفوش يدلعو و لا يقولو كلمه حلوه خصوصا في هكي مواقف مع الاطفال
سيناريو مضحك ميوش
دمتي بألف خير

alfasla يقول...

هيا التعريفات ميوش *_^

طبعاً الصغار لما يتلاقو مايديروش خير
والأمهات عطيهم الهدرزه والقيل والقال
ولما عاد يديرلك هاديكا العمله تبدا تتصفر وتتخضر وتقولك والله مايدير فيه هالعبيتر في الحوش ..

هي شوية مراقبة الأمهات لصغارهم
حتمشي المشية رايقه والضيف والمضيف يبدو مرتاحيين ..لكن جيبي وحده طبق

المهم صحيتي ميوش على موضوعك الخفيف الطريف
سلام

may يقول...

ميمى يا غالية

اهلا نورتى اسمعى بنقولك سر ومتقوليش لحد

هو حنى الليبين لسانه جاف لين مولى
(( كرنشى..كرسبى ...))

هههه

نورتى والقعدة ما تحلى الا بيك

may يقول...

هنو

صقع عليك ههه

تعريفات مش لى لايت ((الضى )) بكككككل

وتقولك والله مايدير فيه هالعبيتر في الحوش ..
تصدقى هنو ..الكلمة هذى متاع العبيتر متداولة هلبة بينتنا وزمنية على الاخر لكن شنو معنها مفهمتش

شكرا وحتى انت القاعدة ما تحلى الا بيك

ميووش

مهرة سالم يقول...

السلام عليكم.......
ههههههه
كلهم بهذه الطباع....
تفضلي عندنا البيت وتشوفي العجب....
......
في أمان الله...

may يقول...

نهار وعليكم السلام

صار الحكاية انترنشنل لا مليح بكل

شكرا على المتابعة

ازدان المكان بحضورك

مى

Hayam يقول...

هههههههههههههههههههههههههههه

صح مزبوط ماعندي منقول
ههههههههههههههههههه

may يقول...

يوما

حتى لو معنك ما تقولى

نورتى بضحكاتك

ميوش

naohama يقول...

حلو الفيلم يا ميوش انظر وين خاشتله من قبل
:)
:)
والله رايفت عل مدونتك والتعليق فيها
توا فتح ربي عليا وسلكت معايا
اما عن الاطفال فحدث ولا حرج
مرة سمعت جارتنا - غادي - ف القايلة تقول لولدها يا علي خش خيرلك
يا علي اسمع الكلام
بعدين صوتها بدا يعلي حتى اخترق حاجز الصوت وقالت صارخة
يااااعلييييي خششش خيرررلك واللا نجي ننجرك!!
طبعا ننجرك جاية من نجارة وتخيلي هالام الرقيقة اللي تستعمل ادوات النجارة مع طفلها
بس تبي الصراحة!!! علي هضا النجارة الامومية في منتهى السهولة
فهو قط مزقط زوفري مايقدي عليه حد والقايلة من غير الشلش متاعه تحسيها غريبة كأن امرجلل حدث
وكل مافي الامر ان عليوة خطر له يرقد ساعتها
تعرفي عطيني نمشي غادي ومستعدة نتحمل تقليق علي ف الف قايلة وقايلة
:(

may يقول...

للوش الغالية

مرحبا مرحبا والله الركن ازدهر بحضورك

وين وين

استحشتك هلبببببة

شنو اخبارك

وبنسبة لتعليقك نقرا ونتخيل فيك ليلى وانت تحكى رغم انى مسمعتش الا صوتك الى نبرته مفرقتنيش ما شاء الله عليك...وانى الابتسامة على وجهى كله

يا لويلة مستحشه قويلنا ههههه ...

ماتستحشى غالى هى نبدلوا ولا نقولك رانى معاش مطولة قريب نونسك غادى وتبدا الحكاية صوت وصورة


معاش تغيبى يا سمحة وميوش تستنى فيك بريق اليابس

ناجي الزوي يقول...

الاخت مي
السلام عليكم
ما اعجبني هو صورة الاولاد معلقين علي الشماعة
وفقك الله
الي من يحب الفضول جريدة اجدابيا الاسبوعية التي تصدر عن هياة الاعلام والصحافة بشعبية اجدابيا .. الان علي مدونة الكوز بصفحاتها 12

may يقول...

وعليكم السلام استاذ ناجى

المهم انه يوجد شى قد اعجبك

وساكون ممتبع بعون الله لكل جديد عندك

مى